តួនាទី ភារកិច្ច CHF

សាវតារ

អង្គការ PADEK គឺជាអ្នកដឹកនាំគម្រោង «ពង្រឹងសមត្ថភាពឆ្លើយតបគ្រោះអាសន្ននៃអង្គការមនុស្សធម៌នៅកម្ពុជា» ដោយសម្របសម្រួលបង្កើតជា វេទិកាមនុស្សធម៌កម្ពុជា (CHF)។ CHF ក្រោមការឧបត្ថម្ភគាំទ្រជាថវិកាពី USAID/OFDA បានចាប់ផ្តើមអនុវត្តនៅខែឧសភា ឆ្នាំ២០១២។ គម្រោងនេះសម្របសម្រួលដោយ មជ្ឈមណ្ឌលត្រៀមបង្ការគ្រោះមហន្តរាយអាស៊ី (ADPC) ដោយមានដៃគូរក្នុងប្រទេសជាមួយ NCDM និងសាកលវិទ្យាល័យភូមិន្ទភ្នំពេញ។ គោលដៅរបស់គម្រោងគឺ ពង្រឹងការឆ្លើយតបមនុស្សធម៌ទៅនឹងគ្រោះមហន្តរាយនៅកម្ពុជា តាមរយៈការពង្រឹងសមត្ថភាពជាអ្នកដឹកនាំដល់អង្គការខ្មែរ ដើម្បីភ្ជាប់ទំនាក់ទំនងការងារមនុស្សធម៌ឲ្យកាន់តែប្រសើរឡើង ការផ្តល់ចំណេះដឹង ការបណ្តុះបណ្តាល និងប្រឹក្សាយោបល់។

ទស្សន:វិស័យ

ធ្វើការគាំពារ និងលើកកំពស់សេចក្តីថ្លៃថ្នូរបស់ប្រជាពលរដ្ឋក្នុងប្រទេសកម្ពុជា ជាមួយការការពារ និងការកាត់បន្ថយទុក្ខវេទនា។

បេសកកម្ម

ធ្វើឲ្យកាន់តែប្រសើរឡើងនូវរាល់សកម្មភាពការងារមនុស្សធម៌ លើការងារសង្គ្រោះជីវិតក្នុងកម្រិតសហគមន៍ ក្នុងពេលមាន គ្រោះមហន្តរាយ តាមរយ:ការកសាងសមត្ថភាព និងវគ្គបណ្តុះបណ្តាល គណនេយ្យភាព កិច្ចសហប្រត្តិបត្តិការសម្របសម្រួល និងបទដ្ឋានគុណភាពនៃជំនួយមនុស្សធម៌។

គោលបំណង

ពង្រឹងការងារឆ្លើយតប ជាមួយគ្រោះមហន្តរាយក្នុងប្រទេសកម្ពុជា តាមរយ:ការបង្កើនសមត្ថភាពដឹកនាំនៃអង្គការមនុស្សធម៌ ដើម្បីចូលរួមក្នុងរង្វង់ការងារជំនួយមនុស្សធម៌តាមរយ:ការផ្តល់ធនធានជាចំណេះដឹង វគ្គបណ្តុះបណ្តាល និងការណែនាំ។

ទិសដៅ

ផ្តល់នូវវេទិកាបណ្តាញសម្រាប់ប្រមូល និងចែកចាយព័ត៌មាន ព្រមទាំងការប្រាស្រ័យទាក់ទងដើម្បីជួយដល់អ្នករងគ្រោះឲ្យទទួលបានតាមតម្រូវការ
ជួយលើកកំពស់ការយល់ដឹងរវាងអង្គការ ដែលធ្វើការងារផ្តល់ជំនួយមនុស្សធម៌ និងអង្គការដែលធ្វើការងារអភិវឌ្ឍន៍ តាមរយ:ការងារតស៊ូមតិ ទាមទារឲ្យបានកាន់តែប្រសើរលើការងារផ្តល់ជំនួយមនុស្សធម៌
បង្កើន និងពង្រឹងសមត្ថភាពផ្នែកការងារត្រៀមបង្ការ និងឆ្លើយតបគ្រោះមហន្តរាយនិងគណនេយ្យភាពខ្ពស់ សម្រាប់រាល់ការងារផ្តល់ជំនួយមនុស្សធម៌
ចូលរួមការងារឆ្លើយតបក្នុងលក្ខណ:ជាបណ្តាញតែមួយ សម្រាប់រាល់ការងារ ឬសកម្មភាពជំនួយមនុស្សធម៌ក្នុងកម្រិតសហគមន៍។

គណៈកម្មការប្រតិបត្តិ នៃវេទិកាមនុស្សធម៌កម្ពុជា

ដឹកនាំវេទិកាមនុស្សធម៌កម្ពុជា
ដឹកនាំអង្គប្រជុំទាំងឡាយរបស់វេទិកាមនុស្សធម៌កម្ពុជារៀបចំរបៀបវារ:សម្រាប់ការប្រជុំ ព្រមទាំងធ្វើរបាយការណ៍នៃអង្គប្រជុំទាំងនោះ
ផ្អែកលើលទ្ធផលនៃការប៉ាន់ប្រមាណតម្រូវការនៃវគ្គបណ្តុះបណ្តាលចូលរួមផ្តល់យោបល់ និងចូលរួមធ្វើការសម្រេចចិត្តទៅលើប្រធានបទដែលត្រូវបង្រៀន
ដឹកនាំកិច្ចសហប្រត្តិបត្តិការសម្របសម្រួលជាមួយសមាជិក CHF ក៏ដូចជាជាមួយស្ថាប័នដ៏ទៃ និងជាមួយស្ថាប័នរដ្ឋាភិបាល នៅពេលធ្វើការងារឆ្លើយតបជាមួយគ្រោះមហន្តរាយ
ដឹកនាំកិច្ចសហប្រត្តិបត្តិការសម្របសម្រួលក្នុងការងារប៉ាន់ប្រមាណ និងការស្វែងរកធនធានដើម្បីឆ្លើយតបទៅនិងគ្រោះមហន្តរាយ
ចូលរួមក្នុងនាមជាតំណាងឲ្យ CHF នូវរាល់អង្គប្រជុំជាមួយស្ថាប័នរដ្ឋាភិបាល និងអង្គប្រជុំដ៏ទៃទៀតដែលពាក់ព័ន្ធជាមួយនិងការងារគ្រោះមហន្តរាយ
ធ្វើការតស៊ូមតិជាមួយរដ្ឋាភិបាល ទៅលើបញ្ហាចាំបាច់ទាំងឡាយដើម្បីជាប្រយោជន៍ដល់ជនក្រីក្រ និងអ្នករងគ្រោះ
ទំនាក់ទំនងជាមួយអង្គការជាតិ និងអន្តរជាតិនានា ដើម្បីជាប្រយោជន៍ដល់វេទិកាCHF
ធ្វើការចែកចាយព័ត៌មានចាំបាច់នានាដល់សមាជិកវេទិកា CHF
ធ្វើការសហការយ៉ាងជិតស្និទជាមួយលេខាធិការដ្ឋាន CHF ក្នុងការធ្វើផែនការការស្វែងរកធនធាន និងការកសាងគម្រោងស្នើសុំជាដើម
ធ្វើការសហការជាមួយម្ចាស់ជំនួយ ដៃគូរ និងលេខាធិការដ្ឋាន CHF
ចូលរួមធ្វើការសម្រេចចិត្តនិងគិតគូរពីការងារកសាងសមត្ថភាព របស់សមាជិក CHF
ត្រួតពិនិត្យតាមដានសភាពការគ្រោះមហន្តរាយជាប្រចាំ និងធ្វើការជូនដំណឹងដល់សមាជិក CHF និងស្ថាប័នពាក់ព័ន្ធក្នុងករណីចាំបាច់

តួនាទីអ្នកសម្របសម្រួលតំបន់

ដឹកនាំកិច្ចសហប្រតិបត្តិការសម្របសម្រួល ជាមួយសមាជិកវេទិកានៅក្នុងតំបន់ របស់ខ្លួន
ដឹកនាំកិច្ចសម្របសម្រួលក្នុងការងារប៉ាន់ប្រមាណតម្រូវការ និងការងារសម្របសម្រួលគ្រោះអាសន្ន
ធ្វើរបាយការណ៍ (របាយការណ៍ស្ថានភាព របាយការណ៍ឆ្លើយតប របាយកាណ៍ប៉ាន់ប្រមាណតម្រូវការគ្រោះមហន្តរាយ) និងផ្ដល់ព័ត៌មានដែលពាក់ព័ន្ធផ្សេងៗមកគណៈកម្មាធិការប្រតិបត្តិ និងលេខាធិការដ្ឋាន
ធ្វើការសហការយ៉ាងជិតស្និទជាមួយស្ថាប័នរដ្ឋាភិបាល (គណៈកម្មាធិការគ្រប់គ្រងគ្រោះមហន្តរាយខេត្ត) និងដៃគូរវេទិការដទៃ
ជាតំណាងគណៈកម្មការប្រតិបត្តិនៅក្នុងតំបន់

តួនាទីអ្នកសម្របសម្រួលខេត្ត

ផ្ដល់ការគាំទ្រដល់អ្នកសម្របសម្រួលតំបន់
ដឹកនាំសម្របសម្រួលនៅក្នុងខេត្តរបស់ខ្លួន លើការងារត្រៀមបង្ការ និងឆ្លើយតបគ្រោះមហន្តរាយ
ធ្វើការសហការយ៉ាងជិតស្និទជាមួយស្ថាប័នរដ្ឋាភិបាល (គណៈកម្មាធិការគ្រប់គ្រងគ្រោះមហន្តរាយខេត្ត) និងដៃគូរវេទិការដទៃនៅក្នុងខេត្តរបស់ខ្លួន
ប្ដេជ្ញាចិត្តចូលរួមរាល់សកម្មភាពត្រៀមបង្ការ និងឆ្លើយតបគ្រោះមហន្តរាយនៅក្នុងខេត្ត
ធ្វើរបាយការណ៍ (របាយការណ៍ស្ថានភាព របាយការណ៍ឆ្លើយតប របាយកាណ៍ប៉ាន់ប្រមាណតម្រូវការគ្រោះមហន្តរាយ) របស់ខេត្តខ្លួន
ជូនអ្នកសម្របសម្រួលតំបន់

តួនាទីលេខាធិការដ្ឋាន

ផ្តល់នូវវិស័យបច្ចេកទេសដើម្បីដំណើរការវេទិកា
ផ្តល់មតិយោបល់ ដំបូន្មាន និងសេវាបម្រើដល់សមាជិកវេទិកា និងគណៈកម្មការប្រតិបត្តិ CHF
ជួយដល់គណៈកម្មការប្រតិបត្តិ CHF ក្នុងការរៀបចំអង្គប្រជុំ ឬសិក្ខាសាលានានា
រៀបចំមេរៀនសម្រាប់វគ្គបណ្តុះបណ្តាលនិងរៀបចំវគ្គបណ្តុះបណ្តាលទាំងនោះ
ជួយមើលការខុសត្រូវរាល់ការងារទាំងអស់របស់ CHF
ជួយដល់គណៈកម្មការប្រតិបត្តិ CHF ក្នុងការងារតស៊ូមតិទាំងឡាយ
អនុវត្តផែនការការងាររបស់ CHF
រៀបចំអង្គប្រជុំរបស់ CHF ធ្វើលិខិតអញ្ជើញ និងធ្វើកំណត់ហេតុនៃអង្គប្រជុំទាំងនោះ
ធ្វើការចែកចាយព័ត៌មានផ្សេងៗរបស់ CHF ដល់សមាជិក CHF និងភាគីពាក់ព័ន្ធ
ជួយដល់គណៈកម្មការប្រតិបត្តិ CHF ក្នុងការស្វែងរកធនធានដើម្បីដំណើរការងារCHF
ផ្តល់កិច្ចសហការដល់គណៈកម្មការប្រតិបត្តិ CHF ក្នុងការកសាងសមត្ថភាពរបស់សមាជិក CHF
ជួយដល់គណៈកម្មការប្រតិបត្តិ CHF ក្នុងការកសាងផែនការយុទ្ធសាស្ត្ររបស់ CHF
ទំនាក់ទំនងតភ្ជាប់ CHF ជាមួយថ្នាក់ជាតិថ្នាក់តំបន់ និងថ្នាក់អន្តរជាតិ
រៀបចំទុកដាក់ថែរក្សារឯកសាររបស់ CHF ឲ្យបានត្រឹមត្រូវតាមលក្ខណ:បច្ចេកទេស
ផ្តល់នូវទម្រង់បែបបទសម្រាប់ការងារត្រួតពិនិត្យវាយតម្លៃ និងរបាយការណ៍
ជួយអន្តរាគមន៍ដល់សមាជិក CHF ដែលរងគ្រោះដោយគ្រោះមហន្តរាយ

តួនាទីសមាជិកវេទិកា CHF

ចូលរួមក្នុងអង្គប្រជុំ ឬសិក្ខាសាលារបស់ CHF យ៉ាងសកម្ម និងទៀងទាត់
ចូលរួមក្នុងការជ្រើសរើសសមាសភាពគណកម្មការ CHF ជារៀងរាល់អាណត្តិ
ចូលរួមចែកចាយចំណេះដឹង និងបទពិសោធន៍ផ្សេងៗដែលទាក់ទងទៅនឹងការងារត្រៀមបង្ការឆ្លើយតបទៅនិងគ្រោះមហន្តរាយដល់សមាជិក CHF ទាំងអស់
ផ្តល់មតិយោបល់ដល់គណកម្មការ CHF
ចូលរួមក្នុងការងារត្រៀមបង្ការ និងឆ្លើយតបគ្រោះមហន្តរាយ ឬការងារសង្គ្រោះបន្ទាន់នានា
ចូលរួមសហការជាមួយលេខាធិការដ្ឋាន CHF
មានសិទ្ធិបោះឆ្នោតជ្រើសរើសសមាជិកគណៈកម្មការប្រតិបត្តិ និងអ្នកសម្របសម្រួលតាមខេត្ត និងតាមតំបន់
ចូលរួមក្នុងការធ្វើផែនការនានារបស់ CHF
ជួយចែកចាយព័ត៌មានស្តីពីគ្រោះមហន្តរាយនៅថ្នាក់ក្រោមជាតិ
ចូលរួមសិក្សាក្នុងវគ្គបណ្តុះបណ្តាលនានាដែលផ្តល់ជូនដោយ CHF
ជួយបំផុសការយល់ដឹងអំពីការងារត្រៀមបង្ការគ្រោះមហន្តរាយនៅថ្នាក់សហគមន៍
ចូលរួមចំណែកក្នុងការងារប៉ាន់ប្រមាណពេលមានគ្រោះមហន្តរាយកើតឡើង
ចូលរួមលើកកំពស់គណនេយ្យភាពតម្លាភាព និងគុណភាពចំពោះរាល់ការងារដែលខ្លួនត្រូវធ្វើ
រួមគ្នាជួយជ្រោមជ្រែងនិងពង្រឹងដល់លេខាធិការដ្ឋាន
ធ្វើរបាយការណ៍ (របាយការណ៍ស្ថានភាព របាយការណ៍ឆ្លើយតប របាយកាណ៍ប៉ាន់ប្រមាណតម្រូវការគ្រោះមហន្តរាយ) ជូនអ្នកសម្របសម្រួលខេត្តរបស់ CHF

ភាពជាសមាជិកនិងការចុះឈ្មោះជាសមាជិក

សមាជិកភាពគួរត្រូវបានរាប់បញ្ចូល និងបើកទូលាយដល់រាល់អង្កការដែលធ្វើការផ្តល់ជំនួយមនុស្សធម៌ដល់អ្នករងគ្រោះដោយគ្រោះមហន្តរាយ ជាពិសេសអង្គការខ្មែរទាំងអស់ និងអង្គការសង្គមស៊ីវីលដែលកំពុងធ្វើការក្នុងប្រទេសកម្ពុជា
អង្គការមនុស្សធម៌ អង្គការសង្គមស៊ីវីល និងអង្គការខ្មែរទាំងឡាយណាដែលចង់ចូលជាសមាជិកវេទិកាមនុស្សធម៌កម្ពុជា ត្រូវដាក់ពាក្យសុំចុះឈ្មោះតាមគេហទំព័រ CHF (www.chfcambodia.net) និងផ្ញើពាក្យសុំចុះឈ្មោះទៅលេខាធិការដ្ឋាន CHF។ បុគ្គលិកលេខាធិការដ្ឋាននឹងធ្វើការពិនិត្យលើសមាសភាព និងប្រវត្តិរបស់អង្គការនោះ រួចហើយនឹងជូនយោបល់ដល់គណៈកម្មការប្រតិបត្តិ CHF ដើម្បីសម្រេច។ គណៈកម្មការប្រតិបត្តិ CHF ជាអ្នកមានសិទ្ធសម្រេចថាទទួល ឬមិនទទួលជាសមាជិកផ្អែកលើលក្ខណ:វិនិច្ឆ័យដែលបានកំណត់។ ពេលបានការអនុញ្ញាតិទទួលស្គាល់ដោយគណៈកម្មការប្រតិបត្តិរួចហើយ ឈ្មោះអង្គការនោះនឹងត្រូវបានប្រកាសទទួលស្គាល់ថាជាសមាជិករបស់វេទិកាមនុស្សធម៌កម្ពុជាជាផ្លូវការ នៅលើគេហទំព័ររបស់CHF។

អណត្តិ

គណៈកម្មការប្រតិបត្តិរបស់វេទិកាមនុស្សធម៌កម្ពុជា គួររួមមានសមាជិកចំនួនបី ឬប្រាំនាក់ដែលក្នុងនោះយ៉ាងហោចណាស់ ត្រូវមានសមាសភាពជាស្រ្តីយ៉ាងតិចពីរនាក់ ដែលមកពីអង្គការផ្សេងៗគ្នា ហើយដែលជាសមាជិក CHF។ សមាជិក
គណៈកម្មការនីមួយៗមានអណត្តិចំនួនបីឆ្នាំ។ ប៉ុន្តែសមាជិកគណៈកម្មការនីមួយៗអាចបន្តអាណត្តិរបស់ខ្លួនបាន បើសិនជាសមាជិករបស់ CHF ជ្រើសរើសគាត់ឱ្យបន្តមួយអាណត្តិបន្ថែមទៀត ប៉ុន្តែសមាជិកគណៈកម្មការនីមួយៗមិនអាចបន្តរធ្វើជាសមាជិកគណៈកម្មការប្រតិបត្តិលើសពី ពីរអណត្តិបានឡើយ។ ក្រោយពីបញ្ចប់ ០២ អណត្តិ សមាជិកគណៈកម្មាធិការត្រូវមិនឈរឈ្មោះ០១អណត្តិសិន ហើយបន្ទាប់ មកបើសិនជាចង់ឈរឈ្មោះបន្ត គឺអាចឈរឈ្មោះបន្តទៀតបាន។
អណត្តិរបស់អ្នកសម្របសម្រួលតាមខេត្ត និងអ្នកសម្របសម្រួលតំបន់ មានរយៈពេល បីឆ្នាំ។

ការជ្រើសរើសសមាជិកគណកម្មការ CHF

លក្ខណ:វិនិច្ឆ័យត្រូវបានព្រាងដោយលេខាធិការដ្ឋាន និងសម្រេចដោយមតិភាគច្រើននៃសមាជិក CHF។ ផ្អែកលើលក្ខណ:វិនិច្ឆ័យនោះការ ជ្រើសរើសនឹងត្រូវធ្វើឡើងតាមរបៀបពីរយ៉ាង៖

វិធីទី១គឺតាមរយ:ការស្ម័គ្រចិត្តរបស់សមាជិក CHF
វិធីទី២ គឺតាមរយ:ការបោះឆ្នោតជ្រើសរើស

ផលប្រយោជន៍

ក្នុងភាពជាសមាជិកនៃ CHF នឹងបានទទួលផលប្រយោជន៍ដូចតទៅ៖

ត្រូវបានទទួលការកសាងសមត្ថភាពលើផ្នែកត្រៀមបង្ការ និងឆ្លើយតបចំពោះគ្រោះមហន្តរាយ តាមរយ:ការអនុវត្តន៍ផ្ទាល់ និងតាមរយ:វគ្គបណ្តុះបណ្តាលនានា
ទទួលបានបទពិសោធន៍តាមការអនុវត្តន៍លើការប៉ាន់ប្រមាណចែកជំនួយ
សង្គ្រោះបន្ទាន់ ការត្រួតពិនិត្យតាមដាននិងវាយតម្លៃការងារ
បានចូលរួមក្នុងការងារត្រៀមបង្ការ
បានយល់ដឹងក្នុងការដាក់បញ្ចូលការងារត្រៀមបង្ការ និងឆ្លើយតបគ្រោះមហន្តរាយ ទៅក្នុងផែនការសកម្មភាពនៃការងារអភិវឌ្ឍន៍
ទទួលបានផលប្រយោជន៍ដោយផ្ទាល់តាមការប្រើប្រាស់គេហទំព័ររបស់ CHF
បានស្គាល់ម្ចាស់មូលនិធិនិងយល់ដឹងវិធីសាស្រ្តទំនាក់ទំនងជាមួយពួកគេ ក្នុងការស្វែងរកជំនួយ
ទទួលបានព័ត៌មានព្រមានជាមុនស្តីពីគ្រោះមហន្តរាយ ទទួលបានការទទួលស្គាល់ពីរដ្ឋាភិបាល
មានសង្ឃឹមច្រើនតាមរយ:ការងារជាបណ្តាញក្នុងការងារតស៊ូមតិឬការងារស្វែងរកជំនួយ

សមាជិកគណកម្មការវិញ ក៏អាចទទួលបានផលប្រយោជន៍បន្ថែមទៀតដូចជា៖

ទទួលបានបទពិសោធន៍ក្នុងការដឹកនាំវេទិកា
ទទួលបានការចូលរួម និងទទួលស្គាល់ដោយអង្គការអន្តរជាតិនានា ក៏ដូចជាការទទួលស្គាល់ពីសំណាក់រដ្ឋាភិបាល ទាំងថ្នាក់ជាតិ និងថ្នាក់ក្រោមជាតិ អំពីស្នាដៃ និងលទ្ធផលការងាររបស់វេទិកាមនុស្សធម៌កម្ពុជា។

ជំនួយដែល CHF ត្រូវការ

សមាជិក CHF ទាំងអស់នឹងបានទទួលការជួយទំនុកបម្រុង ផ្នែកការកសាងសមត្ថភាព តាមរយ:ការផ្តល់វគ្គបណ្តុះបណ្តាលផ្សេងៗ ទៅលើប្រធានបទត្រៀមបង្ការ និងឆ្លើយតបជាមួយគ្រោះមហន្តរាយ ក៏ដូចគ្នាផងដែរពេលនោះគណៈកម្មការ នឹងបានទទួលការបណ្តុះបណ្តាល និងបទពិសោធន៍ស្តីពីការងារសហប្រត្តិបត្តិការសម្របសម្រួល ការិយាល័យសម្រាប់លេខាធិការដ្ឋាន និងសម្ភារ:ក្នុងការិយាល័យជាដើម។ល។

របាយការណ៍

នៅក្នុងពេលវេលាធម្មតា(ពេលគ្មានគ្រោះមហន្តរាយ) គណៈកម្មការប្រតិបត្តិ CHFគួរសរសេររបាយការណ៍រៀងរាល់ប្រាំមួយខែម្តង និងរៀងរាល់មួយឆ្នាំម្តងជាទៀងទាត់
នៅក្នុងពេលមានគ្រោះមហន្តរាយ គណៈកម្មការប្រតិបត្តិ គួរសរសេររបាយការណ៍ទាន់ហេតុការ(Situation Report) របាយការណ៍នៃការងារប៉ាន់ប្រមាណ របាយការណ៍នៃការងារឆ្លើយតប និងរបាយការដទៃទៀត ទៅតាមតម្រូវការចាំបាច់
របាយការណ៍ទាំងនោះដូចបានរៀបរាប់ខាងលើ គួរត្រូវផ្ញើជូនដល់គណៈកម្មាធិការជាតិគ្រប់គ្រងគ្រោះមហន្តរាយ គណៈកម្មាធិការគ្រប់គ្រងគ្រោះមហន្តរាយខេត្ត ក្នុងតំបន់គោលដៅ លេខាធិការដ្ឋាន CHF និងសមាជិក CHF។ ច្បាប់ចម្លងនៃរបាយការទាំងនោះគួរត្រូវបានដាក់ចូលទៅក្នុងគេហទំព័រនៃ CHF។